Thursday, October 23, 2008

Kepada YB-YB yang paling sey sayang....

Nama sey ni KARIM...pengundi berdaftar DUN CHOMBUNG,PARLIMEN ROMBAU.sey nulih sughat ni bukan apa...sajo yor nk ucap'an timo kasih kek YB-YB sekolian sobab naik'an hargo minyak ari tu.Lopeh ni bilo hargo munyak naik,hargo barang lain pun naik gak laaaa....banggo boto' sey ghaso...mcm duduk kek LAS VEGAS lak.
Sey janji ngan YB-YB semuo,yang sey akan ubah tebiat sey dari makan ikan kombung yang dah merah menyalo mato'eh dan pocah bedorai porut ikan tu pado ikan koring yor. Sey sanggup bekorban intuk negaro.
Anak sey yang tujuh orang tu yang dah buleh buek team futsal tu boleh la bekojo lopeh sekolah,buek bantu mak ayah diaorang ni haaaa....kok tak bekojo pun buleh la jadi mat rompit kek SENAWANG tu... dapek gak la duit sesikit....buleh gak la menoruskan tradisi keluarga sey ni yang tak pornah durhako pada negaro.
Ghaso-ghaso, sey ni nak ubah suai bilik-bilik yang ado kek ghumah sey...nak buek tompek bolo ikan ngan tanam sayur cagho hidroponik(apo binchek'eh ni?)sey terpakso tanam kek dalam bilik sobab sey tingga' kek umah flat.
Rebet yang YB bagi kek sey memang melampuh-lampuh lobeh'eh dari keperluan sey.Bilo sey congak-congak'an,sey cumo guno 20 sen yor duit minyak moto sehari... ado la untung 21 sen... bak kato si SAIDA AF6 'okey la tuuuuu'.
Sey tak pakai pun keto sobab bilo minyak naik hargo,sey kono jual Datsun kotak mancis sey tu.Dapek gak la duit,tokeh-tokeh pun ado la hasil'eh.
Team futsal sey tu, sey nak suruh eksesais hari-hari berjalan kaki tak pun naik beska' poie sekolah...ado la 5km... dokek yor tuuu.....Walaupun gaji sey ni RM1,000...sbona'eh terlobih cukup untuk keluargo sey...
Buek permulaan nak ngubah kehidupan se...sey tak akan guno'ah gulo bilo buek kopi...tak akan guno'ah topung untuk buek kodok.Sey nak ganti'an bogheh ngan ubi...tiap hari sey ngan keluargo akan berposo(kecuali pado hari-hari yang dilarang beposo)sey akan buek minyak masak sendiri.Itu antaro caro sey ngubah caro hidup.
Ado banyak laie caro... semuo kerano negaro kito.Dan sey mintak bona'YB naik'an laie hargo minyak yang ado...bukan tu yorr...sey mintak bona' naik'an laie hargo tol sobab orang sbolah rumah sey nih orang pembangkang... dio slalu guno highway, biar padan muko dio...tula...suko bona' nyokong pembangkang...PAKATAN RAKYAT konon... Padanlah muko ekau,bayolah tol banyak-banyak.
Nanti YB buleh la melawat sey dan sedokah pada sey solai kain pelekat bilo dah nak dokek-dokek pilihan raya nanti...Insya-Allah kain pelekat tu sey nak bubuh dalam frame dan gantung kek rumah...tapi jangan lupo lak...YB sain otogeraf yor kek kain tu...
Jangan lupo YB, naik'an laie hargo minyak.Jangan la diturunka'an gaji mentori-mentori tuuu...sian diorang...kang apo lak anak bini'eh nak makan... tak dapek pulak nak menyoping kek Landen...
Akhir kato,sey totap nyokong YB-YB sekalian.Sey takkan nyokong pembangkang...ntah apo-apo ntah.Jangan lupo yo YB, naikkan tol banyak-banyak, bia oghang sbolah rumah sey yang nyokong pembangkang tu tojoley lidah'eh nak bayar...


Sekian timo kasih.

Pocah kaco.pocah goleh,
dah baco,harap baleh.

www.infinitydownline.com
Learn how anyone,(even internet dummies) can create sick amounts of money by turning $25 into a Mega Fortune!